पुण्यात पावसामुळे झाड कोसळून दुसरा बळी; रिक्शावर गुलमोहोर पडल्याने ज्येष्ठ महिलेचा मृत्यू

पुणे, २८ मे २०२५ — निलायम पुल ते नाशिक फडके सभागृह मार्गावर आज दुपारी सुमारे ३:३० वाजता भीषण घटना घडली. मुसळधार पावसामुळे कमकुवत झालेला गुलमोहोराचे झाड रस्त्यावरून जात असलेल्या एका रिक्शावर कोसळले, ज्यामुळे रिक्शातील ७६ वर्षीय शुभदा यशवंत सप्रे (रा. सिंहगड रस्ता) यांचा दुर्दैवी मृत्यू झाला.

पेशवे ऊर्जा उद्यानाशेजारील हे झाड जोरदार पावसामुळे मुळापासून कोसळले आणि थेट चालत्या रिक्शावर आदळले. अपघातात शुभदा सप्रे यांच्या डोक्याला गंभीर इजा झाली, तर रिक्शाचालक संजय अवचरे यांना किरकोळ दुखापत झाली. दोघांनाही तत्काळ चैतन्य रुग्णालयात दाखल करण्यात आले; मात्र उपचारादरम्यान शुभदा सप्रे यांचा मृत्यू झाला.

अपघातानंतर महापालिकेच्या यंत्रणांनी रस्त्यावरून झाड हटवले असून, पोलिसांनी अपघाती मृत्यूची नोंद केली आहे.

ही घटना पुण्यात या पावसाळ्यात झाड कोसळून झालेल्या दुसऱ्या मृत्यूची नोंद ठरली आहे. अवघ्या दोन दिवसांपूर्वी अलंकार पोलीस ठाण्याजवळ राहुल जोशी यांचा अशाच प्रकारच्या घटनेत मृत्यू झाला होता. या घटना लक्षात घेता पावसाळ्यात झाडांच्या देखभालीकडे दुर्लक्ष होत असल्याची चिंता स्थानिक रहिवाशांनी व्यक्त केली असून, महापालिकेने तात्काळ उपाययोजना कराव्यात, अशी मागणी करण्यात येत आहे.