पुणे शहरात मध्यवर्ती भागात भुयारी मार्ग उभारणीला गती – महापालिका आयुक्त

पुणे, १४ ऑगस्ट २०२५: शहराच्या मध्यवर्ती भागातील वाहतूक कोंडी, रस्त्यांवरील खड्डे आणि नागरिकांच्या विविध समस्या कायमस्वरूपी सोडवण्यासाठी पुणे महापालिकेकडून भुयारी मार्ग उभारणीसह ठोस पावले उचलली जात आहेत. तात्काळ उपाययोजना आणि दीर्घकालीन नियोजन या दोन्ही स्तरांवर काम सुरू असून, रखडलेली रस्ते दुरुस्तीची कामे पूर्ण करणे व फुटपाथ अतिक्रमणमुक्त करणे हे प्रशासनाचे प्रमुख उद्दिष्ट असल्याची माहिती आयुक्त नवल किशोर राम यांनी दिली. येत्या वर्षभरात या प्रयत्नांचे सकारात्मक परिणाम दिसून येतील, असा त्यांनी विश्वास व्यक्त केला.

गणेशोत्सवाच्या पार्श्वभूमीवर पायाभूत सुविधांचा आढावा घेण्यासाठी आणि कसबा विधानसभा मतदारसंघातील समस्या जाणून घेण्यासाठी आमदार हेमंत रासने, महापालिका आयुक्त, वरिष्ठ अधिकारी आणि संबंधित विभागप्रमुखांनी पाहणी केली. यावेळी नागरिकांशी थेट संवाद साधण्यात आला. उपस्थितांमध्ये अतिरिक्त आयुक्त पृथ्वीराज बी. पी., पोलीस उपायुक्त (झोन १) ऋषिकेश रावले, रस्ते विभाग प्रमुख अनिरुद्ध पावसकर, घनकचरा विभागाचे संदीप कदम, पाणीपुरवठा विभागाचे नंदकुमार जगताप, महावितरणचे काकडे तसेच माजी नगरसेवक व पदाधिकारी उपस्थित होते.

आमदार रासने यांनी सांगितले की, पुण्याचा गणेशोत्सव हा जगभरातील आकर्षणाचा केंद्रबिंदू असून, यंदा राज्य सरकारने त्याला “महाराष्ट्र राज्याचा महोत्सव” म्हणून मान्यता दिली आहे. त्यामुळे भाविकांच्या सोयीसाठी पायाभूत सुविधा अधिक सक्षम करणे आवश्यक आहे. शनिवारवाडा–स्वारगेट आणि सारसबाग–शनिवारवाडा या दोन भुयारी मार्ग प्रकल्पांचे अहवाल अंतिम टप्प्यात असून राज्य सरकार त्याबाबत सकारात्मक आहे.

पाहणी दौऱ्यात आमदार रासने, आयुक्त नवल किशोर राम आणि पोलीस उपायुक्त कृषिकेष रावले यांनी रिक्षातून प्रवास करून नागरिकांच्या अडचणी व सूचना जाणून घेतल्या.