कुंडेश्वर देवदर्शनासाठी निघालेल्या पिकअपचा भीषण अपघात; सात महिलांचा मृत्यू, ३५ गंभीर जखमी

राजगुरूनगर, ता. ११ ऑगस्ट : पाईट येथील कुंडेश्वर देवदर्शनासाठी निघालेल्या पिकअप वाहनाचा भीषण अपघात होऊन सात महिलांचा मृत्यू झाला असून ३५ हून अधिक महिला गंभीर जखमी झाल्या आहेत. मृतांचा आकडा आणखी वाढण्याची शक्यता व्यक्त केली जात आहे.

श्रावणी सोमवारनिमित्त खेड तालुक्यातील भाविक मोठ्या संख्येने कुंडेश्वर येथे दर्शनासाठी येतात. आज सकाळी सुमारे ११ वाजण्याच्या सुमारास महिलांनी खच्चून भरलेले पिकअप वाहन रस्त्यावर नियंत्रण सुटल्याने तब्बल पाच ते सहा वेळा पलटी झाले. अपघात इतका भीषण होता की अनेक महिलांना गंभीर दुखापती झाल्या.

घटनेनंतर स्थानिक ग्रामस्थांनी तातडीने मदतकार्य सुरू केले. खाजगी वाहनांसह १० हून अधिक ॲम्ब्युलन्सद्वारे जखमींना तातडीने जवळील रुग्णालयात हलविण्यात आले. उपचारापूर्वीच सात महिलांचा मृत्यू झाला. ३५ हून अधिक जखमींवर उपचार सुरू असून काहींची प्रकृती गंभीर आहे.

अपघात अत्यंत गंभीर असल्याने मृतांचा आकडा वाढण्याची शक्यता आहे, अशी माहिती पाईटचे माजी सरपंच जयसिंग दरेकर यांनी दिली. सध्या घटनास्थळी मदतकार्य सुरू आहे.