कोट्यवधी रुपये पाण्यात! पुणे-सोलापूर महामार्ग उखडल्याने प्रवाशांमध्ये तीव्र संताप; अधिकाऱ्यांच्या हलगर्जीपणावर प्रश्नचिन्ह

हडपसर, २९ मे २०२५: नुकतेच नूतनीकरण करण्यात आलेल्या पुणे-सोलापूर राष्ट्रीय महामार्गाची अवघ्या आठ महिन्यांतच चाळण झाली आहे. रस्त्यावर पसरलेली खडी आणि उखडलेली डांबराची पायथी यामुळे प्रवाशांना मोठ्या अडचणींचा सामना करावा लागत असून, रस्त्याचा दर्जा आणि संबंधित अधिकाऱ्यांच्या कार्यपद्धतीवर नागरिकांनी रोष व्यक्त केला आहे.

महागडं नूतनीकरण, पण निकृष्ट कामगिरी
हडपसर येथील रवी दर्शन सोसायटी ते फुरसुंगी फाटा दरम्यान महामार्गाचे डांबरीकरण करण्यात आले होते. विशेष म्हणजे, या रस्त्याची स्थिती पूर्वी चांगली असतानाही कोट्यवधी रुपये खर्चून नूतनीकरणाचे काम करण्यात आले. मात्र, काही आठवड्यांच्या पावसानेच रस्त्याची पोलखोल केली असून, सर्वत्र खडी पसरल्याने अपघातांचा धोका वाढला आहे.

विधिमंडळातही कबुली, तरीही दुर्लक्ष
या महामार्गावरील काम निकृष्ट दर्जाचे असल्याची स्वतःची कबुली तत्कालीन सार्वजनिक बांधकाम मंत्री रवींद्र चव्हाण यांनी विधिमंडळात दिली होती. आमदार भीमराव तापकीर यांनी उपस्थित केलेल्या प्रश्नावर उत्तर देताना त्यांनी काही ठिकाणी खडी उघडी पडल्याचे मान्य केले होते. त्यावर उपाय म्हणून संबंधित ठेकेदाराकडून दुरुस्ती केली गेल्याचेही ते म्हणाले होते. मात्र प्रत्यक्षात आजही परिस्थिती बदललेली नाही.

सत्ताधाऱ्यांचाही संताप व्यक्त
भाजपचे पुणे जिल्हा सरचिटणीस राहुल शेवाळे यांनी या प्रकरणात तीव्र नाराजी व्यक्त करत म्हटले, “महामार्ग निकृष्ट दर्जाच्या कामामुळे उखडला असून, अधिकाऱ्यांच्या हलगर्जीपणामुळे जनतेचे कोट्यवधी रुपये वाया गेले आहेत.”

राष्ट्रीय महामार्ग प्राधिकरणाकडून प्रतिक्रिया
शाखा अभियंता अतुल सुर्वे यांनी सांगितले, “पावसामुळे पाणी साचते आहे. काही व्यावसायिकांनी निचरा लाईनमध्ये मलबा टाकल्याने साचलेल्या पाण्यामुळे खडी उघडी पडत आहे. ठेकेदाराला नोटीस पाठवली असून, तात्काळ दुरुस्ती केली जाईल.”

पूर्वीच दिलं होतं पत्र, पण दुर्लक्षच
या रस्त्याच्या निकृष्ट कामाबाबत राष्ट्रीय महामार्ग प्राधिकरणाच्या अधिकारी श्रुती नाईक यांना स्थानिकांनी आधीच पत्र देत भेट घेतली होती आणि ठेकेदाराला चांगले काम करण्यास सांगण्याची विनंती केली होती. मात्र याकडे दुर्लक्ष करण्यात आले, आणि आजचा रस्ता हे त्याचेच फलित असल्याची भावना नागरिकांमध्ये आहे.