पुणे: कात्रज कोंढव्याच्या भूसंपादनासाठी साडे नऊ कोटी मंजूर

पुणे, ३ जानेवारी २०२५: कात्रज कोंढवा रस्त्याचे रुंदीकरण करताना राष्ट्रीय महामार्ग प्राधिकरणातर्फे उड्डाणपुलाची लांबी वाढविण्याचा निर्णय घेतला आहे. यासाठी वंडर सिटी ते राजस सोसायटी दरम्यानच्या जागा भूसंपादन करण्यासाठी जागा मालकांना रोख मोबदला दिला जाणार आहे. त्यासाठी ९ कोटी ५७ लाख १ हजार २१० रुपयांच्या निधीला स्थायी समितीमध्ये मान्यता देण्यात आली.

कात्रज कोंढवा रस्त्याचे काम २०१७ पासून सुरु झाले. पण महापालिकेला भूसंपादन करता न आल्याने हा प्रकल्प रखडला आहे. जागा ताब्यात घेण्यासाठी जागा मालकांशी संवाद साधण्यात आलेल्या अपयशामुळे हा प्रकल्प लांबला आणि त्याच्या भूसंपादनाचा खर्चही वाढली आहे. पूर्वी भूसंपादनासाठी ७५० कोटी रुपये लागणार होते, आता एकूण खर्च ११०० कोटीच्या घरात गेला आहे. आत्तापर्यंत या प्रकल्पाचे सुमारे ३० टक्के काम पूर्ण झाले आहे. उर्वरित काम करण्यासाठी तरीही ८८३ कोटी रुपये भूसंपादनासाठी लागणार आहेत. राज्य सरकारने भूसंपादनासाठी १३९.८३ कोटी रुपये महापालिकेला दिले आहेत. महापालिकेने यासाठी आणखी ४२५ कोटी रुपये शासनाकडे मागितले आहेत.

कात्रज एसएचएआयतर्फे चौकात उड्डाणपुलाचे काम सुरु आहे. त्यात कात्रज कोंढवा रस्त्यावरील उड्डाणपुलाची लांबी वाढविण्याचा निर्णय घेतला आहे. केंद्रीय मंत्री नितीन गडकरी यांनी व्हिडिओकॉन्फरन्सींगद्वारे घेतलेल्या बैठकीत महापालिकेने जागा उपलब्ध करून द्यावी, उड्डाणपूल आम्ही स्वखर्चाने बांधतो असे महापालिकेला सांगितले होते. त्यानुसार ५० मिटर रस्त्याच्या रुंदीकरणासाठी आवश्‍यक असलेल्या जागा ताब्यात घेण्यासाठी महापालिकेने प्रक्रिया सुरु केली आहे. सात जागा मालकांकडून २७०५ चौरस मिटर जागा ताब्यात घेण्यासाठी मूल्यांकन करण्यात आले आहे. मूल्यांक शुल्कावरील मुद्रांक ७ टक्के शुल्क, एकूण मूल्यांकनावर येणारी सरळकृती मुद्रांक शुल्क ७ टक्के, नोंदणी शुल्क, मोजणी रक्कम आणि एक टक्का टीडीएस कपात करून उर्वरित रक्कम जागा मालकास देण्यात येणार आहे. त्यासाठी स्थायी समितीच्या बैठकीत ९ कोटी ५७ लाख १ हजार २१० रुपयांचा मोबदला देण्याचा प्रस्ताव प्रशासक तथा आयुक्त डॉ. राजेंद्र भोसले यांनी स्थायी समितीमध्ये मान्य केला.