पुणे: पोलीस आयुक्त विनयकुमार चौबे यांची पालखी सोहळा निमित्त देहू व आळंदीला भेट; सुरक्षा व्यवस्थेचा घेतला आढावा

पिंपरी चिंचवड, २७ जून २०२४: पिंपरी चिंचवड पोलिस आयुक्त विनय कुमार चौबे यांनी पालखी सोहळ्याच्या अनुषंगाने आज आळंदी व देहू येथे भेट दिली. चौबेनी सुरक्षा व्यवस्थेचा आढावा घेतला तसेच बंदोबस्ताबाबत सूचना केल्या.

श्रीक्षेत्र देहू येथील श्री संत तुकाराम महाराज संस्थान विश्वस्त मंडळ चे माणिक महाराज मोरे, भानुदास महाराज मोरे, संजय महाराज मोरे तसेच आळंदी येथील श्री ज्ञानेश्वर महाराज संस्थानचे विश्वस्त योगी निरंजननाथ, आळंदी नगर परिषदेचे मुख्याधिकारी कैलास केंद्रे, दिंडी मालक आरफरकल, जोग महाराज वारकरी शिक्षण संस्थेचे विश्वस्त तुकाराम महाराज मुळीक, संतोष महाराज सुंबे, आळंदी शहरातील दक्षता कमिटीचे डी डी भोसले पाटील, प्रकाश कुराडे, संजय घुंडरे पाटील आणि स्थानिक तसेच काही वारकऱ्यांशी यावेळी पोलिस आयुक्त विनय कुमार चौबे यांनी संवाद साधला.

अपर पोलीस आयुक्त वसंत परदेशी, पोलीस उपायुक्त (गुन्हे) संदीप डोईफोडे, पोलीस उपायुक्त (मुख्यालय) माधुरी कांगणे, पोलीस उपायुक्त (परिमंडळ २) बापू बांगर, पोलीस उपायुक्त (परिमंडळ ३) डॉ शिवाजी पवार, सहाय्यक पोलीस आयुक्त (गुन्हे) डॉ विशाल हिरे, सहाय्यक पोलीस आयुक्त (पिंपरी विभाग) सचिन हिरे, सहाय्यक पोलीस आयुक्त (चाकण विभाग) राजेंद्रसिंग गौर, सहाय्यक पोलीस आयुक्त (देहू रोड विभाग) देविदास गेवारे, पोलीस स्टेशनचे व गुन्हे शाखेचे अधिकारी हे देखील उपस्थित होते.

पालखीच्या दर्शनासाठी भाविक मोठी गर्दी करतात. दर्शन घेण्याच्या घाईत अनेकांना आपल्या मोबाईल, रोख रक्कम, दागिन्यांचे भान राहत नाही. याचाच फायदा घेऊन चोरटे अलगद दागिने, मोबाईल, रोख रक्कम चोरून नेतात. मागील वर्षी असे प्रकार उघडकीस आले होते. त्यामुळे यावर्षी पालखीला व मार्गावर देखील सीसीटीव्ही कॅमेरे लावण्यात आलेले आहेत.

वारकऱ्यांच्या वेशभूषेत पोलिस

खाकी वर्दीत, साध्या तसेच वारकऱ्यांच्या वेशभूषेत देखील पोलिस पालखी सोहळ्यात सहभागी झाले आहेत. पायी वारीदरम्यान चोऱ्यामाऱ्या, सोनसाखळी चोरी, खिसेकापण्याचे प्रकार यावर नजर ठेवण्यात येत आहे.

साध्यावेशातील ‘वाॅचर’

पालखी सोहळ्यात विविध जिल्ह्यातील चोरटे सहभागी होतात. वारी दरम्यान चोऱ्यामाऱ्या करतात. यंदा पालखी सोहळ्याच्या पार्श्वभूमीवर त्या गुन्हेगारांवर संबंधित शहरातील पोलिसांकडून प्रतिबंधात्मक कारवाई केली. तसेच मागील वर्षी ज्या भागातील गुन्हेगारांनी पालखी सोहळ्यात गुन्हे केले त्या भागातील अनुभवी पोलिस अधिकारी आणि कर्मचाऱ्यांची पथके पालखी सोहळ्यासाठी मागवली आहेत. ही पथके आपापल्या हद्दीतील रेकॉर्डवरील गुन्हेगारांवर ‘वॉचर’ बनून नजर ठेवत आहेत.