Pune: पीएमपीएमएल कडून “फिरते पास केंद्र” उपक्रमाची सुरुवात

पुणे, ०५/०८/२०२५: पुणे महानगर परिवहन महामंडळाचे अध्यक्ष व व्यवस्थापकीय संचालक पंकज देवरे यांच्या संकल्पनेतून “फिरते पास केंद्र” ही अभिनव योजना राबविण्यात येत आहे. या उपक्रमाच्या माध्यमातून प्रवाशांच्या व विद्यार्थ्यांच्या सोयीसाठी मासिक प्रवास पास सुविधा आता थेट त्यांच्या परिसरात उपलब्ध होणार आहे. “फिरते पास केंद्र” या अभिनव उपक्रमाचे उद्घाटन परिवहन महामंडळाचे अध्यक्ष व व्यवस्थापकीय संचालक पंकज देवरे यांच्या हस्ते व सहव्यवस्थापकीय संचालक नितीन नार्वेकर आणि मुख्य कार्यकारी अधिकारी आशा राऊत यांच्या प्रमुख उपस्थितीत आज दिनांक ५ ऑगस्ट २०२५ रोजी मुख्य प्रशासकीय कार्यालयाच्या आवारात करण्यात आले.

“फिरते पास केंद्र” उपक्रमाची ठळक वैशिष्ट्ये:
१. सेवा क्षेत्र – फिरते पास केंद्र सध्या पुणे, पिंपरी-चिंचवड व पीएमआरडीएच्या ग्रामीण हद्दीतील ६ ठिकाणी सोमवार ते शनिवार दरम्यान कार्यरत राहील.
२. प्रवाशांसाठी सुविधा –
विद्यार्थी, ज्येष्ठ नागरिक आणि सर्वसामान्य प्रवाशांसाठी मासिक पास काढण्याची सुविधा उपलब्ध करून देण्यात येईल. तसेच महापालिकेच्या अनुदानित पास योजनांविषयीची माहितीही याठिकाणी दिली जाणार आहे.
३. देयक पद्धती – रोख रक्कम, क्यू आर कोड आणि पी.ओ.एस. मशीनद्वारे पास शुल्क स्वीकारले जाणार आहे.
४. महामंडळाच्या विविध योजना माहितीचे प्रबोधन – प्रवाशांना पीएमपीएमएल च्या उपक्रमांविषयी माहिती दिली जाणार आहे: पुणे दर्शन, पुणे पर्यटन बस सेवा, आपली पीएमपीएमएल मोबाईल अॅप, महिला विशेष बस सेवा, रातराणी बस सेवा.
५. नागरिक व विद्यार्थ्यांची सोय तसेच उत्पन्नवाढीचा हेतू – फिरते पास केंद्राच्या माध्यमातून नागरिक व विद्यार्थ्यांची सोय करणे तसेच महामंडळाच्या उत्पन्नात वाढ करणे हा या उपक्रमाचा उद्देश आहे.
६. साप्ताहिक वेळापत्रक व ठिकाणे (सोमवार ते शनिवार वेळ – सकाळी ७.३० ते १.३०):

दिवस – ठिकाण
सोमवार एस. एन. डी. टी. कॉलेज (मेट्रो स्टेशन)
मंगळवार कोंढवा गेट (एन. डी. ए. गेट सर्कल)
बुधवार खडी मशिन चौक (के. जे. व जे. के. कॉलेज)
गुरुवार राधा चौक (बाणेर – बालेवाडी)
शुक्रवार हिंजवडी गाव (शिवाजी चौक)
शनिवार आकुर्डी रेल्वे स्टेशन

या उपक्रमाद्वारे पीएमपीएमएलच्या सेवा अधिक प्रभावीपणे जनसामान्यांपर्यंत पोहोचणार असून भविष्यात उत्पन्नवाढीच्या व प्रवाशांच्या सोयीच्या दृष्टीने इतर भागांतही फिरते पास केंद्र सुरु करण्याचा मानस आहे.