पुणे ः अवैध मद्य तस्करीविरुद्ध राज्य उत्पादन शुल्क विभागाची कारवाई; ४८ लाखांचा मुद्देमाल जप्त

पुणे, दि. १८ डिसेंबर : परराज्यातून महाराष्ट्रात होणाऱ्या अवैध मद्य तस्करीविरुद्ध राज्य उत्पादन शुल्क, पुणे विभागाने दोन स्वतंत्र कारवाया रचून पाच आरोपींना अटक केली आणि वाहनांसह सुमारे ४८ लाख रुपयांचा मुद्देमाल जप्त केला आहे.

पुणे–सोलापूर मार्गावरील उरुळी कांचन गावाच्या हद्दीत गोपनीय माहितीच्या आधारे पथकाने चारचाकी वाहन (MH12 MR 1904) तपासले. वाहनातून गोवा राज्य निर्मित विदेशी मद्याच्या विविध ब्रँडच्या मोठ्या प्रमाणात बाटल्या आढळल्या. वाहनचालकास अटक करण्यात आली. पुढील तपासात मुख्य सूत्रधारास करमाळा (जि. सोलापूर) येथून अटक करण्यात आली. या प्रकरणात एकूण तीन आरोपींना अटक करून वाहनासह ४,७१,७८० रुपये किंमतीचा मुद्देमाल जप्त करण्यात आला.

सासवड विभागाच्या पथकाने सातारा–पुणे राष्ट्रीय महामार्गावर सारोळा गाव हद्दीत सापळा रचून सहाचाकी ट्रक (MH12 SI 25918) तपासला. औषधांच्या आडून गोवा राज्यात विक्रीसाठी असलेले विदेशी मद्य वाहतूक होत असल्याचे उघडकीस आले. या प्रकरणात दोन आरोपींना अटक करून ट्रकासह ४३,५७,४०० रुपये किंमतीचा मुद्देमाल जप्त करण्यात आला.

ही कारवाई आयुक्त, राज्य उत्पादन शुल्क, मुंबई – राजेश देशमुख, सह-आयुक्त (अंमलबजावणी व दक्षता) – प्रसाद सुर्वे, तसेच विभागीय उपआयुक्त, पुणे – सागर धोमकर यांच्या आदेशानुसार आणि अधीक्षक, पुणे – अतुल कानडे यांच्या मार्गदर्शनाखाली करण्यात आली.

जिल्ह्यातील दोन महानगरपालिकांच्या निवडणुकांच्या पार्श्वभूमीवर मतदारांना प्रलोभन देण्यासाठी परराज्यातील स्वस्त दारू येण्याची शक्यता लक्षात घेऊन पुणे राज्य उत्पादन शुल्क विभागाने २१ पथके कार्यरत ठेवली आहेत.
अधीक्षक अतुल कानडे यांनी गुन्हेगारांवर विशेष पाळत, रात्रगस्त व वाहनांची कसून तपासणी करण्याचे निर्देश दिले आहेत. अवैध मद्य निर्मिती, वाहतूक व विक्रीविरुद्ध पुढेही कठोर कारवाई सुरू राहणार आहे.

अवैध मद्याबाबत माहिती असल्यास नागरिकांनी टोल फ्री क्रमांक १८००-२३३-९९९९ किंवा दूरध्वनी क्रमांक ०२०-२६१२७३२१ वर संपर्क साधावा, असे राज्य उत्पादन शुल्क विभागाकडून आवाहन करण्यात आले आहे.