‘मिशन लक्षवेध’ अंतर्गत आर्थिक साहाय्यासाठी खाजगी अकादमींना प्रस्ताव सादर करण्याचे आवाहन

पुणे, ३ एप्रिल २०२५: राज्यातील खेळाडूंनी ऑलिम्पिकसारख्या आंतरराष्ट्रीय क्रीडा स्पर्धेत पदके संपादित करावीत या उद्देशाने ‘मिशन लक्ष्यवेध’ योजना राबविण्यात येत असून या योजनेंतर्गत खाजगी क्रीडा अकादमींनी आर्थिक साहाय्यासाठी प्रस्ताव सादर करावेत, असे आवाहन करण्यात आले आहे.

महाराष्ट्र राज्यात क्रीडा संस्कृतीचे संवर्धन, प्रचार, प्रसार व जोपासना करण्यासाठी व प्रतिभावंत खेळाडू तयार करण्यासाठी शासन सतत प्रयत्नशील आहे. राज्यातील खेळाडूंसाठी अद्ययावत क्रीडा प्रशिक्षण यंत्रणा, क्रीडा विषयक पायाभूत सुविधा, क्रीडा वेद्यकशास्र, क्रीडा स्पर्धाचे आयोजन, खेळाडूंना पुरस्कार व प्रोत्साहन, खेळाडूंकरिता करीअर मार्गदर्शन व खेळाडूंच्या क्षमता विकासासाठी देशी, विदेशी प्रशिक्षक व संस्थांचा सहयोग हे सर्व घटक विकसित करण्याच्या उद्देशाने ‘मिशन लक्ष्यवेध’ या महत्वाकांक्षी योजनेची अंमलबजावणी करण्यात येत आहे.

मिशन लक्ष्यवेध अंतर्गत निवडण्यात आलेल्या अॅथलेटिक्स, आर्चरी, बॅडमिंटन, बॉक्सिग, हॉकी, लॉन टेनिस, रोईंग, शूटींग, सेलींग, टेबल टेनिस, वेटलिफ्टिंग, कुस्ती या १२ क्रीडा प्रकाराच्या राज्यातील उत्तम खेळाडू निर्माण करणाऱ्या खाजगी अकादमींना आर्थिक साहाय्य देऊन अशा संस्थांचे सक्षमीकरण करण्यात येणार आहे.

यासाठी संबधित अकादमी मधील खेळाडू, क्रीडा मार्गदर्शक, सहायक प्रशिक्षक, प्रशिक्षणासाठी उपलब्ध पायाभूत सुविधा व त्यांचा स्तर, क्रीडा साहित्य व क्रीडा अकादमीच्या कामगिरींचे गुणांकन करण्यात येणार आहे. यात ३५ ते ५० गुण प्राप्त करणाऱ्या संस्था ‘क’ वर्ग, ५१ ते ७५ गुण प्राप्त करणाऱ्या संस्था ‘ब’ वर्ग व ७६ ते १०० गुण प्राप्त करणाऱ्या संस्था ‘अ’ वर्ग अशा प्रकारे वर्गीकरण करण्यात येणार आहे. ‘क’ वर्ग अकादमींना वार्षिक १० लाख रुपये, ब वर्ग २० लाख रुपये तर ‘अ’ वर्ग अकादमींना वार्षिक ३० लाख रुपये आर्थिक साहाय्य, पायाभूत क्रीडा सुविधा उभारणी, क्रीडा सुविधा उत्रत करणे, प्रशिक्षक मानधन, क्रीडा व प्रशिक्षण उपकरणे आदी बाबींवर खर्च करण्यासाठी देण्यात येणार आहे.

त्यानुसार इच्छुक संस्थांनी अधिक माहिती व अर्जाचे नमुन्यासाठी आपल्या जिल्ह्यातील जिल्हा क्रीडा अधिकारी कार्यालयाशी संपर्क साधावा, असे राज्याचे क्रीडा व युवक सेवा सहसंचालक सुधीर मोरे यांनी कळविले आहे.