November 17, 2026

पुणे : जयस्तंभ शौर्यदिन सोहळ्याच्या तयारीला प्रशासनाकडून सुरुवात; १ जानेवारी २०२७ च्या कार्यक्रमाचा जिल्हाधिकाऱ्यांकडून आढावा

पुणे, दि. १७ नोव्हेंबर २०२६ : पेरणे गावातील ऐतिहासिक जयस्तंभ येथे १ जानेवारी २०२७ रोजी आयोजित करण्यात येणाऱ्या शौर्यदिन अभिवादन सोहळ्याच्या तयारीला पुणे जिल्हा प्रशासनाने सुरुवात केली आहे. या पार्श्वभूमीवर जिल्हाधिकारी जितेंद्र डुडी यांनी सोमवारी (दि. १६ नोव्हेंबर) तयारीचा आढावा घेतला. तसेच विविध शासकीय विभागांना त्यांच्या जबाबदारीतील कामे निश्चित मुदतीत पूर्ण करण्याचे निर्देश दिले.

पुणे जिल्हाधिकारी कार्यालयात आयोजित या आढावा बैठकीला जिल्हा परिषदेचे मुख्य कार्यकारी अधिकारी गजानन पाटील, पोलीस उपायुक्त अविनाश कुमार, बार्टीच्या निबंधक डॉ. सुचिता शिंदे, विभागप्रमुख डॉ. बाबन जोगदंड, समाजकल्याण विभागाचे सहाय्यक आयुक्त विशाल लोंढे आणि प्रादेशिक उपआयुक्त वंदना कोचुरे यांच्यासह विविध विभागांचे अधिकारी उपस्थित होते.

यावेळी जिल्हाधिकारी डुडी यांनी सर्व विभागांनी परस्पर समन्वयाने काम करून कार्यक्रम सुरळीत, सुरक्षित आणि नियोजनबद्ध पद्धतीने पार पाडण्याच्या सूचना दिल्या. तसेच निविदा प्रक्रिया निर्धारित वेळेत पूर्ण करून प्रलंबित कामांना गती देण्याचे निर्देशही त्यांनी दिले.

सार्वजनिक बांधकाम विभागाला सोहळ्यासाठी येणाऱ्या अनुयायांच्या वाहनांसाठी पुरेशी पार्किंग व्यवस्था करण्यास सांगण्यात आले. तर वीज विभागाला कार्यक्रमस्थळी अखंडित वीजपुरवठा आणि पुरेशा प्रकाशव्यवस्थेची खात्री करण्याचे निर्देश देण्यात आले.

पुणे महानगर परिवहन महामंडळाला (पीएमपीएमएल) मागील वर्षांप्रमाणेच अनुयायांच्या वाहतुकीसाठी पुरेशा बस उपलब्ध करून देण्याच्या सूचना देण्यात आल्या. याशिवाय परिसरातील आरोग्य सुविधा, वैद्यकीय पथके, सार्वजनिक स्वच्छतागृहे, पिण्याचे पाणी आणि स्वच्छता व्यवस्थेचाही आढावा घेण्यात आला.

देशभरातून येणाऱ्या अनुयायांना शौर्यदिन सोहळ्यादरम्यान कोणत्याही प्रकारची गैरसोय होऊ नये, यावर जिल्हाधिकारी डुडी यांनी विशेष भर दिला. सर्व विभागप्रमुखांनी नियमित समन्वय ठेवून तयारीची कामे कोणताही विलंब न करता वेळेत पूर्ण करावीत, असे निर्देश त्यांनी दिले.

यावेळी पोलीस विभागासह विविध शासकीय विभागांच्या अधिकाऱ्यांनी १ जानेवारीच्या सोहळ्यासाठी करण्यात येत असलेल्या तयारीची माहिती सादर केली.