July 22, 2024

पुणे: खासगी कंपनीतील कर्मचाऱ्यांना धमकावून लुटले

पुणे, २५/०६/२०२३: कामावरुन घरी निघालेल्या खासगी कंपनीतील कर्मचाऱ्यांना शस्त्राचा धाक दाखवून चोरट्यांनी तीन मोबाइल संच, रोकड असा मुद्देमाल लुटून नेल्याची घटना पुणे-सोलापूर रस्त्यावर हडपसर भागात घडली.

 

याबाबत खासगी कंपनीतील कर्मचाऱ्याने हडपसर पोलीस ठाण्यात फिर्याद दिली आहे. तक्रारदार एका खासगी कंपनीत कामाला आहे. मध्यरात्री कर्मचारी आणि दोन सहकारी कंपनीतून घरी निघाले होते. पुणे-सोलापूर रस्त्यावर बजाज शोरुमजवळ ते बसची वाट पाहत थांबले होते. त्या वेळी दुचाकीवरुन आलेल्या चोरट्यांनी खासगी कंपनीतील तीन कर्मचाऱ्यांना शस्त्राचा धाक दाखविला. त्यांच्याकडील तीन मोबाइल संच, दोन हजारांची रोकड असा ५२ हजार रुपयांचा मुद्देमाल लुटून चोरटे पसार झाले. पोलीस उपनिरीक्षक अविनाश शिंदे तपास करत आहेत.