२०३० पर्यंत पुणे देशातील सर्वांत मोठे मोबिलिटी हब बनेल, मुख्यमंत्री देवेंद्र फडणवीस यांनी व्यक्त केला विश्वास

पुणे, ३ नोव्हेंबर २०२६ : पुणे आणि पिंपरी-चिंचवडसह पुणे महानगर प्रदेशात मेट्रोचे जाळे विस्तारत असून, आगामी काळात सार्वजनिक वाहतुकीच्या पायाभूत सुविधांमध्ये मोठी गुंतवणूक केली जाणार आहे. मेट्रो, इलेक्ट्रिक बस, रिंगरोड, भूमिगत मार्ग आणि नवीन विमानतळ अशा विविध प्रकल्पांच्या माध्यमातून २०३० पर्यंत पुणे महानगर प्रदेश देशातील सर्वांत मोठे आणि सुलभ मोबिलिटी केंद्र बनेल, असा विश्वास मुख्यमंत्री देवेंद्र फडणवीस यांनी व्यक्त केला.

हिंजवडी ते शिवाजीनगर मेट्रो मार्गाच्या लोकार्पण सोहळ्यात ते बोलत होते. या वेळी पंतप्रधान नरेंद्र मोदी, राज्यपाल सी. पी. राधाकृष्णन, उपमुख्यमंत्री अजित पवार, केंद्रीय मंत्री मुरलीधर मोहोळ यांच्यासह विविध लोकप्रतिनिधी उपस्थित होते.

हिंजवडी हा देशातील प्रमुख माहिती-तंत्रज्ञान केंद्रांपैकी एक आहे. या परिसरात दररोज लाखो कर्मचारी ये-जा करतात. वाहतूक कोंडीमुळे त्यांचा दररोज दीड ते दोन तासांचा वेळ वाया जात होता. हिंजवडी-शिवाजीनगर मेट्रो सुरू झाल्यामुळे आयटी क्षेत्रातील कर्मचारी आणि सर्वसामान्य प्रवाशांना मोठा दिलासा मिळणार आहे. या मार्गिकेचे आणखी एक वैशिष्ट्य म्हणजे महिलांच्या सहभागातून या मेट्रोचे संचालन होणार आहे, असे फडणवीस यांनी सांगितले.

पीपीपी मॉडेलमधील देशातील पहिला प्रकल्प

केंद्र सरकारने २०१७ मध्ये सार्वजनिक-खासगी भागीदारीतून मेट्रो प्रकल्प उभारण्याचे धोरण तयार केले. त्यानुसार हिंजवडी-शिवाजीनगर हा देशातील पहिला मेट्रो प्रकल्प साकार झाला आहे. टाटा प्रोजेक्ट्स आणि सीमेन्स यांनी एकत्रितपणे हे आव्हान पूर्ण केले. राज्य सरकारने जमीन संपादनासह आवश्यक प्रक्रिया वेळेत पूर्ण केल्याचे त्यांनी नमूद केले.

मेट्रोचे जाळे आणखी विस्तारण्यावर भर

पुणे महानगर प्रदेशात सुमारे १२० किलोमीटर लांबीच्या मेट्रो मार्गांचे काम पूर्ण झाले असून, काही मार्गांचे काम प्रगतिपथावर आहे. महाराष्ट्रात देशातील सर्वाधिक मेट्रो मार्गांचे जाळे विकसित होत आहे. पुणे महानगर प्रदेशातील १२ महापालिका क्षेत्रांमध्ये मेट्रो पोहोचविण्याचे नियोजन आहे. नीती आयोगाच्या माध्यमातून पुणे महानगर प्रदेशाच्या विकासासाठी पाच हजार कोटी रुपयांचा निधी उपलब्ध झाला आहे.

पुणे मेट्रो ही हरित मेट्रो असून, तिच्या एकूण ऊर्जेच्या गरजेपैकी ३० टक्के ऊर्जा स्वतः निर्माण केली जात आहे. मेट्रोच्या दुसऱ्या टप्प्यात वनाज-चांदणी चौक, रामवाडी-विठ्ठलवाडी, खराडी-खडकवासला आणि नळस्टॉप-मानिकबाग या मार्गांचा समावेश आहे. या प्रकल्पांमुळे पुण्याच्या सार्वजनिक वाहतूक व्यवस्थेला मोठी चालना मिळेल. भविष्यात मेट्रोचे जाळे नवीन विमानतळाशी जोडण्याचेही नियोजन असल्याचे फडणवीस यांनी स्पष्ट केले.

पंतप्रधान नरेंद्र मोदी यांच्या नेतृत्वाखाली देश आणि महाराष्ट्र विकासाच्या दिशेने वेगाने वाटचाल करत असून, त्यांच्या मार्गदर्शनामुळे पायाभूत सुविधा क्षेत्रात मोठे परिवर्तन घडत असल्याचेही त्यांनी सांगितले.