पुणे व पिंपरी-चिंचवड शहरांना गती देणारा नवा टप्पा म्हणजे ‘चऱ्होली’ व ‘माण’ ई-बस डेपोः अजित पवार

पिंपरी-चिंचवड, २५/०४/२०२५: पुणे व पिंपरी-चिंचवड शहरांची वाढती लोकसंख्या विचारात घेवून वाहतूक कोंडीची समस्या सोडविण्यासाठी पीएमपीएमएल व मेट्रो या सार्वजनिक प्रवासी वाहतूक पुरविणाऱ्या संस्थांना सक्षम करण्यासाठी प्रयत्न केले जात आहेत. पीएमपीएमएल चे चऱ्होली व माण हे दोन नवीन ई-बस डेपो म्हणजे पुणे व पिंपरी-चिंचवड शहरांना गती देणारा नवा टप्पा आहेत, असे प्रतिपादन महाराष्ट्र राज्याचे उपमुख्यमंत्री तथा पुणे जिल्ह्याचे पालकमंत्री अजित पवार यांनी केले.

पीएमपीएमएल च्या ‘चऱ्होली’ व ‘माण’ या दोन नवीन ई-बस डेपोंच्या उद्‍घाटन प्रसंगी चऱ्होली ई-बस डेपो मध्ये झालेल्या कार्यक्रमात ते बोलत होते. याप्रसंगी महाराष्ट्र राज्य विधानसभा उपाध्यक्ष अण्णा बनसोडे यांची प्रमुख उपस्थिती होती. कार्यक्रमास आमदार बापूसाहेब पठारे, पिंपरी-चिंचवड मनपाचे माजी महापौर मा. योगेश बहल, पुणे मनपा आयुक्त डॉ. राजेंद्र भोसले, पिंपरी-चिंचवड मनपा आयुक्त शेखर सिंह, पीएमपीएमएल च्या अध्यक्ष व व्यवस्थापकीय संचालक मा. श्रीमती दिपा मुधोळ-मुंडे, सहव्यवस्थापकीय संचालक नितीन नार्वेकर व मुख्य कार्यकारी अधिकारी मा. प्रज्ञा पोतदार-पवार आदी मान्यवर उपस्थित होते.

  कार्यक्रमाच्या प्रारंभी काश्मीर मधील पहलगाम येथे झालेल्या भ्याड दहशतवादी हल्ल्यात मृत्यूमुखी पडलेल्या निष्पाप नागरिकांना श्रध्दांजली वाहण्यात आली.

प्रास्ताविकपर भाषणात पीएमपीएमएल च्या अध्यक्ष व व्यवस्थापकीय संचालक  दिपा मुधोळ-मुंडे यांनी पीएमपीएमएल च्या सद्यस्थितीचा आढावा सादर केला. मुख्य कार्यकारी अधिकारी मा. प्रज्ञा पोतदार-पवार यांनी आभार मानले.

 पवार यांच्या भाषणातील ठळक मुद्दे

 पीएमपीएमएल ला पीएमआरडीए कडून ५०० सीएनजी बसेस व पुणे आणि पिंपरी-चिंचवड महानगरपालिकेकडून ५०० सीएनजी बसेस तसेच जीसीसी तत्वावर ५०० ई-बसेस अशा एकूण १५०० बसेस उपलब्ध करून दिल्या जाणार आहेत.

 पीएमआरडीए कडून ५०० सीएनजी बसेस साठी लागणारा २३० कोटी रूपयांचा निधी पीएमपीएमएल कडे वर्ग.

 लाखो लोक नोकरी, शिक्षण व रोजगाराच्या शोधात पुणे शहरात येत असतात. त्यांना बससेवा देण्यासाठी पीएमपीएमएल च्या माध्यमातून सार्वजनिक वाहतूक व्यवस्थेचे साधन उपलब्ध आहे.

 उन्हाच्या वाढत्या पाऱ्यावर टिप्पणी करताना श्रीमंत माणूस स्वतःच्या एसी गाडीतून फिरतो परंतु कॉमन मॅन एसी बस मधून फिरला पाहिजे यासाठी सीएनजी बसेस एसी असाव्यात अशा सूचना त्यांनी अधिकाऱ्यांना केल्या.

 चऱ्होली उपनगराची सध्याची लोकसंख्या १.५० लाख असून २०४१ साली ही लोकसंख्या १०.५० लाखांवर तर पिंपरी-चिंचवड शहराची लोकसंख्या ६१ लाखांवर जाईल. वाढत्या लोकसंख्येबरोबरच वाहतूक समस्यांचा विचार करून सार्वजनिक वाहतूक व्यवस्था सक्षम करण्याचे प्रयत्न सुरू आहेत.

 ‘चऱ्होली’ व ‘माण’ या दोन नवीन ई-बस डेपोंच्या माध्यमातून प्रदूषण कमी होवून नागरिकांना उत्तम सेवा देण्याचा प्रयत्न.

 ग्रीन महाराष्ट्र ही संकल्पना या दोन ई-बस डेपोंच्या माध्यमातून पुढे येत आहे.

 पीएमपीएमएल मधील २४० दिवस पूर्ण केलेल्या १७४१ कर्मचाऱ्यांना कायम केले.

 २०२० मध्ये १४६५ पीएमपीएमएल कर्मचाऱ्यांना कायम केले.

 पीएमपीएमएल कर्मचाऱ्यांना ७ व्या वेतन आयोगाचा ६८ महिन्यांचा फरक ४ टप्प्यात देण्यात येणार असून त्यापैकी एक हप्ता देण्यात आला आहे.