पुणे: दारु पिताना झालेल्या वादातून मित्राचा खून करणारे अटकेत

पुणे, २७/०८/२०२३: दारु पितानाझालेल्या वादातून मित्राचा खून करुन पसार झालेल्या दोघांना लोणीकंद पोलिसांनी अटक केली. वाघोलीतील केसनंद रस्त्यावर एका सोसायटीसमोर ही घटना घडली होती.

राम सुभाष श्रीरामे (वय २२), गोपाल नाना कोतलापुरे (वय २६, दोघे मूळ रा. नांदेड) अशी अटक करण्यात आलेल्यांची नावो आहेत. शैलेंद्र अप्पा मंडगीकर (वय २४) असे खून झालेल्याचे नाव आहे. श्रीरामे, मंडगीकर, कोतलापुरे केसनंदर रस्त्यावरील सिट्राॅन सोसायटीसमोर दारू पित होते. त्यावेळी मजुरीचे पैसे न दिल्याने त्यांच्यात वाद झाला. त्यावेळी दोघांनी धारदार शस्त्राचे वार करून शैलेंद्रचा खून केला. त्यानंतर श्रीरामे आणि कोतलापुरे पसार झाले.

लोणीकंद पोलीस ठाण्यातील तपास पथकाकडून दोघांचा शोघ घेण्यात येत होता. श्रीरामे तुळजापूर येथे नातेवाईकांकडे येणार असल्याची माहिती मिळाल्यानंतर एक पथक तेथे गेले. त्यांनी त्याला तेथे अटक केली. कोतलापुरे याला वाघोली परिसरातून अटक करण्यात आली. लोणीकंद पोलीस ठाण्याचे वरिष्ठ पोलीस निरीक्षक विश्वजीत काइंगडे, गुन्हे शाखेचे निरीक्षक मारूती पाटील यांच्या मार्गदर्शनाखाली तपास पथकाने कामगिरी केली.