भिसे मृत्यूप्रकरणी दीनानाथ मंगेशकर रुग्णालयातील डॉ. घैसास यांच्या विरुद्ध गुन्हा दाखल

एरंडवणे, १९ एप्रिल २०२५: मोनाली उर्फ ईश्वरी सुशांत भिसे (३७) यांच्या मृत्यूनंतर निर्माण झालेल्या जनक्षोभाच्या पार्श्वभूमीवर, अखेर पुणे पोलिसांनी दीनानाथ मंगेशकर रुग्णालयातील डॉ. सुश्रुत घैसास यांच्याविरुद्ध निष्काळजीपणामुळे मृत्यू घडवून आणल्याचा गुन्हा दाखल केला आहे. मात्र, रुग्णालय प्रशासनाविरोधात कारवाई होणार की नाही, यावर अद्याप पोलिसांनी मौन बाळगले आहे.

ही तक्रार भिसे यांच्या भावाच्या पत्नी प्रियंका पाटे (वय २६) यांनी दिली असून अलंकार पोलिस ठाण्यात भारतीय न्याय संहिता कलम १०६(१) अंतर्गत एफआयआर नोंदवण्यात आला आहे. या कलमानुसार, सदोष मनुष्यवधाच्या श्रेणीबाहेर जाऊन, निष्काळजी किंवा अविचारी कृतीमुळे मृत्यू घडवून आणणाऱ्यास पाच वर्षांपर्यंत तुरुंगवास आणि दंडाची तरतूद आहे. वैद्यकीय उपचारादरम्यान जर नोंदणीकृत वैद्यकीय व्यावसायिकाने असे कृत्य केले असेल, तर ही शिक्षा दोन वर्षांपर्यंत वाढू शकते.

डॉक्टरांनी याआधी भिसे यांना अंडाशय काढून टाकण्यात आल्याने गर्भधारणा करू नये असा सल्ला दिला होता. मात्र, विमाननगर येथील इंदिरा आयव्हीएफ रुग्णालयातून उपचार घेऊन त्यांना यशस्वीरित्या गर्भधारणा झाली आणि जुळी मुलं होणार असल्याचे स्पष्ट झाले.

तक्रारीनुसार, सात महिन्यांची गर्भवती असताना भिसे यांच्या पोटात अचानक वेदना सुरू झाल्या. इंदिरा आयव्हीएफ येथील डॉक्टरांनी एनआयसीयू सुविधा असलेल्या रुग्णालयात मुदतपूर्व प्रसूती करण्याचा सल्ला दिला. त्यामुळे २८ मार्च रोजी सकाळी ९ वाजता त्यांना दीनानाथ मंगेशकर रुग्णालयात नेण्यात आले. मात्र, तिथे प्रवेशासाठी प्रत्येकी १० लाख रुपये (एकूण २० लाख रुपये) आगाऊ भरण्याची अट घालण्यात आली.

कुटुंबीयांनी डॉ. घैसास यांच्याशी चर्चा करून मदतीची विनंती केली. मुख्यमंत्र्यांच्या कार्यालयाकडूनही हस्तक्षेप झाला, पण तरीही रुग्णालय प्रशासनाने तिला दाखल करून घेतले नाही, असा आरोप भिसे कुटुंबियाने केला आहे.

दुपारी साडेदोनच्या सुमारास कुटुंबीयांनी ईश्वरी यांना ससून रुग्णालयात नेले. मात्र तेथे अत्यवस्थ रुग्णांची संख्या जास्त असल्यामुळे, त्यांना वाकड येथील सूर्या रुग्णालयात हलवण्यात आले. तेथे २९ मार्च रोजी त्यांनी जुळ्या मुलांना जन्म दिला. प्रसूतीनंतर त्यांची प्रकृती खालावली आणि त्यानंतर त्यांना बाणेर येथील मणिपाल रुग्णालयात हलवण्यात आले. ३१ मार्च रोजी त्यांचा मृत्यू झाला.

या प्रकरणाचा तपास घेतलेल्या ससून जनरल हॉस्पिटलच्या तज्ज्ञ समितीने आपल्या अहवालात नमूद केले आहे की, दीनानाथ मंगेशकर रुग्णालयाने “गोल्डन आवर” आपत्कालीन काळजी प्रोटोकॉलचे पालन केले नाही. रुग्णाची स्थिती गंभीर असूनही, डॉ. घैसास यांनी रुग्णालयाच्या धोरणानुसार आगाऊ रक्कम भरल्याशिवाय उपचार सुरू करण्यास नकार दिला. या रकमेचा काही भाग अकाली जन्मलेल्या बाळांसाठी एनआयसीयू शुल्कासाठी होता.

डॉ. घैसास यांच्याविरुद्ध एफआयआर दाखल :
डॉ. घैसास यांच्याविरुद्ध एफआयआर दाखल झाल्यामुळे या प्रकरणात महत्त्वाची घडामोड घडली असली तरी, भिसे यांचे कुटुंबीय, नागरिक आणि सामाजिक कार्यकर्ते रुग्णालय प्रशासनालाही जबाबदार धरण्याची मागणी करत आहेत. त्यांच्यामते, ही केवळ डॉक्टरांची चूक नसून, व्यवस्थात्मक अपयशामुळे एका तरुण आईचा जीव गेला आहे.