पथारी विक्रेत्यांच्या हक्कांसाठी दि.१६ रोजी ‘हल्ला बोल’ आंदोलन

पुणे, १३/०१/२०२५: पथारी विक्रेत्यांच्या प्रलंबित मागण्यांकडे लक्ष वेधण्यासाठी लोक जनशक्ती पार्टी (रामविलास) आणि जनशक्ती पथारी विक्रेता कल्याणकारी संघ यांच्या संयुक्त विद्यमाने दि.१६ जानेवारी २०२५ रोजी दुपारी ३ वाजता पुणे महानगरपालिकेच्या गेटवर ‘हल्ला बोल’ आंदोलन आयोजित करण्यात आले आहे.या आंदोलनात जनशक्ती पथारी विक्रेता कल्याणकारी संघाचे अध्यक्ष संजय आल्हाट तसेच शेकडो पथ विक्रेते सहभागी होणार आहेत.आंदोलनाच्या नियोजनासाठी कन्हैया पाटोळे,कल्पना जावळे,के.सी.पवार,राहुल उभे,रणजित सोनावळे,एड.अमित दरेकर,सुहास साबळे यांची समिती करण्यात आली आहे.

पथ विक्रेत्यांचे तात्काळ सर्वेक्षण करून त्यांना परवाने वितरित करावेत, पुणे महानगरपालिकेत शहर विक्रेता समितीसाठी स्वतंत्र कार्यालय सुरू करावे, पथ विक्रेत्यांवर होणारी अतिक्रमण कारवाई थांबवावी, शासनाच्या विविध कल्याणकारी योजना त्वरित अंमलात आणाव्यात, अतिक्रमण कारवाई करताना किमान तीन वेळा लेखी नोटीस द्यावी, महानगरपालिकेच्या नव्या हद्दीत पथ विक्रेत्यांसाठी जागा निश्चित करावी, अशा प्रलंबित मागण्या या आंदोलनाद्वारे पुन्हा मांडण्यात येणार आहेत.

पुणे महानगरपालिकेचे आयुक्त हे पालिकेच्या पथ विक्रेता समितीचे अध्यक्ष असूनही ते पथ विक्रेत्यांच्या हक्कांकडे दुर्लक्ष करीत आहेत. त्यांच्या या दुर्लक्षाला वाचा फोडण्यासाठी हल्ला बोल आंदोलन आयोजित केले जात आहे.या आंदोलनातून पथ विक्रेत्यांना न्याय मिळावा आणि त्यांच्या मागण्या तातडीने मान्य व्हाव्यात, असा निर्धार आयोजकांनी व्यक्त केला आहे.