May 20, 2024

पुणे: आजारपणाला कंटाळून पित्याने केला मुलाचा खून, हडपसर येथील धक्कादायक प्रकार

हडपसर, १४/०३/२०२३: मुलगा वारंवार आजारी असल्याने कोणताही काम धंदा करत नसल्याने पित्याने त्याचा गळा दाबून खून केला तर धक्कादायक प्रकार समोर आला आहे. याप्रकरणी पित्याला हडपसर पोलिसांनी तात्काळ ताब्यात घेतले.

अभिजीत बाबुराव जायभाय (28 रा. तुकाई दर्शन, काळेपडळ, हडपसर) असे खून झालेल्या तरुणाचे नाव आहे. त्याच्या खून प्रकरणी बाबुराव दिनकर जायभाय (50) असे अटक करण्यात आलेल्याचे नाव आहे. याबाबत त्याची पत्नी सुनीता यांनी हडपसर पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, अभिजित, त्याची आई आणि वडील हे तुकाईदर्शन येथे भाडेतत्त्वावर राहण्यास होते. अभिजीतची आई धुणे भांडी तर आरोपी पिता बाबुराव हा हमालीची कामे करत होता. अभिजित हा वारंवार आजारी असल्याने व काहीही कामधंदा करत नव्हता. त्याच्या उपचाराचा खर्च करणे होत नसल्याने गुरुवारी (दि.13) दुपारी साडेबाराच्या सुमारास तो घरातील दिवानवर झोपलेला असताना आरोपी बाबुराव याने त्याचा गळा दाबून खून केला. घटनेची माहिती मिळताच पोलिस उपायुक्त विक्रांत देशमुख, वरिष्ठ पोलीस निरीक्षक अरविंद गोकुळे, गुन्हे निरीक्षक दिगंबर शिंदे आणि विश्वास डगळे, युनिट 5चे निरीक्षक उल्हास कदम, सहायक निरीक्षक विजयकुमार शिंदे यांनी घटनास्थळी भेट दिली.