पुणे: कोरेगाव पार्कमध्ये रशियन दाम्पत्याला मारहाण, दुचाकीस्वारासह साथीदारांवर गुन्हा

पुणे, ०४/०७/२०२३: दुचाकीला पुढे जाण्यास वाट न दिल्याने तिघांनी एका रशियन दाम्पत्याला बेदम मारहाण केली. कोरेगाव पार्क भागात ही घटना घडली.

या प्रकरणी दुचाकीवरील तीन जणांविरुद्ध गुन्हा दाखल करण्यात आला आहे. याबाबत एका रशियन नागरिकाने कोरेगाव पार्क पोलीस ठाण्यात फिर्याद दिली आहे. तक्रारदार मूळचे रशियाचे आहेत. ते नोकरीनिमित्त पुण्यात वास्तव्यास असून एका खासगी कंपनीत सल्लागार आहेत. पादचारी रशियन नागरिक कोरेगाव पार्क भागातून निघाला होता. त्या वेळी दुचाकीस जागा न मिळाल्याने दुचाकीवरील तिघांनी रशियन नागरिकाशी वाद घातला. तरुणांनी रशियन नागरिकाला मारहाण केली. त्या वेळी रशियन नागरिकाच्या पत्नीने मध्यस्थी करणाचा प्रयत्न केला. तेव्हा तिघांनी रशियन महिलेला धक्काबुक्की केली.

आरोपी दुचाकीवरुन पसार झाले आहे. कोरेगाव पार्क पोलिसंनी परिसरातील सीसीटीव्ही कॅमेऱ्यांनी केलेले चित्रीकरण तपासासाठी ताब्यात घेतले असून, पसार झालेल्या आरोपींचा शोध घेण्यात येत आहे.