फुरसुंगी नगरपरिषदेसाठी मिळकतींचे हस्तांतरण, स्थायी समितीची मान्यता

पुणे, २७ फेब्रुवारी २०२५: महापालिकेत २०१७ मध्ये समाविष्ट झालेल्या उरूळी देवाची आणि फुरसुंगी या दोन्ही गावांची स्वतंत्र नगर परिषद स्थापन करण्यात आली आहे. त्यामुळे शासनाच्या आदेशानुसार, महापालिकेच्या इमारती सोडून इतर सर्व शासकीय मिळकती या नगर परिषदेला परत केल्या जाणार आहेत. याबाबतच्या प्रस्तावास स्थायी समितीच्या गुरुवारी झालेल्या बैठकीत मान्यता देण्यात आली.

शासनाकडून ११ सप्टेंबर २०२४ रोजी आदेश काढत या नवीन नगर परिषदेची स्थापना केली आहे. या नगरपरिषदेचे काम तातडीने होणे शक्य नसल्याने विभागीय आयुक्तांंच्या अध्यक्षतेखाली समिती नेमत या गावांच्या विकासाचा रोडमॅप तयार करण्यात आला असून, पुढील सहा महिन्यात टप्प्या टप्प्याने या सोयी सुविधा हस्तांतरीत करण्याचे आदेश देण्यात आले आहेत. त्यानुसार, या नगर परिषदेच्या प्रशासकाकडून महापालिकेकडे ही गावे २०१७ मध्ये समाविष्ट झाली. त्या वेळच्या ग्रामपंचायतीच्या मालकी हक्काच्या इमारती, बखळ, बाजार, गाळे व तसेच इतर मिळकतींची माहिती मागविली होती.

या दोन्ही गावांमधून नागरी सुविधा क्षेत्र (अॅमेनिटी स्पेस ) ताब्यात देण्याचीही मागणी करण्यात आलेली होती. त्यानुसार, या दोन्ही गावांमध्ये ग्रामपंचायतीच्या ११६ मिळकती आणि आरक्षणापोटी ताब्यात आलेल्या १३ जागांची माहिती संकलीत करण्यात आली असून, काही सेवा क्षेत्राच्या जागेवर महापालिकेने सुविधा केंद्र सुरू केली आहेत. त्यानुसार, महापालिकेकडून पहिल्या टप्प्यात दोन्ही ग्रामपंचायती पालिकेत आल्या त्या वेळी ताब्यात घेतलेल्या मिळकती हस्तांतरीत करणे, दुसऱ्या टप्प्यात सेवा क्षेत्र व रस्त्यांसाठी ताब्यात आलेल्या जागा, तर तिसऱ्या टप्प्यात ज्या मिळकतीमध्ये महापालिकेची नागरी सेवा केंद्र आहेत त्या जागा नगर परिषद प्रशासकांच्या ताब्यात देण्यास मान्यता देण्यात आली आहे