पुणे: एकत्रित आत्महत्येस नकार दिल्याने तरुणीच्या खूनाचा प्रयत्न, तरुणाने स्वत:वर केले चाकूने वार

पुणे, २३/०७/२०२३: विवाह न करता एकत्र राहणाऱ्या तरुणीला जाळ्यात ओढून एकत्र आत्महत्या करु, असा तगादा लावणाऱ्या तरुणाने तिचा गळा दाबून खून करण्याचा प्रयत्न केल्याची घटना कोंढवा भागात घडली. तरुणीने नकार दिल्यानंतर तरुणाने स्वत:वर चाकून वार केले, तसेच इमारतीच्या छतावरुन उडी मारून आत्महत्या करण्याची धमकी दिली.

याप्रकरणी योगेश प्रकाश थोरात (वय २८, रा. साकुर्डी, सातारा) याच्याविरुद्ध गुन्हा दाखल करण्यात आला असून, त्याच्यावर ससून रुग्णालयात उपचार करण्यात येत आहे. याबाबत एका १९ वर्षाच्या तरुणीने कोढवा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, योगेश थोरात हा तरुणीच्या घरा शेजारी राहत होता. त्याने तरुणी अल्पवयीन असताना तिला विवाहाचे आमिष दाखवून पळवून नेले. सातारा, कोल्हापूर भागात दोघेजण एकत्र राहत होते. आरोपी योगेश वाहनांवर चालक म्हणून काम करतो.

काही दिवसांपूर्वी योगेश आणि तरुणी कोंढव्यातील गोकुळनगर भागात वास्तव्यास आले. दोन दिवसांपूर्वी त्याने तरुणीला एकत्र आत्महत्या करु, असे सांगितले. तु खालच्या जातीतील आहे. मी पस्तावलो आहे, असे त्याने तिला सांगितले. तरुणीने आत्महत्या करण्यास नकार दिल्यानंतर त्याने मोबाइल चार्जरच्या वायरने गळा आवळून तिचा खून करण्याचा प्रयत्न केला. तरुणीने कशीबशी त्याच्या तावडीतून सुटका केली. त्यानंतर योगेशने पोटावर चाकूने वार केले. इमारतीच्या छतावरुन उडी मारुन आत्महत्या करण्याचा प्रयत्न केला. रहिवाशांनी पकडून त्याला पोलिसांच्या ताब्यात दिले.

योगेश जखमी झाला असून, त्याच्यावर ससून रुग्णालयात उपचार सुरू असल्याचे कोंढवा पोलीस ठाण्याचे वरिष्ठ पोलीस निरीक्षक संतोष साेनवणे यांनी सांगितले. त्याच्याविरुद्ध बाललैंगिक अत्याचार प्रतिबंधक कायदा, तसेच जातीवाचक शिवीगाळ केल्याप्रकरणी गुन्हा दाखल करण्यात आला आहे. सहायक पोलीस आयुक्त साळवे तपास करत आहेत.