पुणे ग्रँड टूर २०२६ : कॅम्प परिसरातील सर्व शाळांना उद्या सुटी

पुणे, २० जानेवारी २०२६ : पुण्यात होत असलेल्या आंतरराष्ट्रीय सायकलिंग स्पर्धा ‘बजाज पुणे ग्रँड टूर २०२६’च्या पार्श्वभूमीवर कॅम्प परिसरातील सर्व सरकारी व खासगी शाळांना बुधवार, दि. २१ जानेवारी रोजी सुटी जाहीर करण्यात आली आहे. पुणे कॅन्टोन्मेंट बोर्ड हद्दीत मोठ्या प्रमाणावर वाहतूक बदल आणि कडेकोट सुरक्षा व्यवस्था लागू करण्यात येणार असल्याने हा निर्णय घेण्यात आला आहे.

जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डुडी यांनी याबाबत अधिकृत आदेश जारी केला आहे. आदेशानुसार, २१ जानेवारी रोजी ‘बजाज पुणे ग्रँड टूर २०२६’चा दुसरा टप्पा (स्टेज-२) कॅम्प परिसरातून जाणार असून, स्पर्धेदरम्यान प्रमुख रस्ते ठरावीक कालावधीसाठी बंद ठेवण्यात येणार आहेत.

या वाहतूक निर्बंधांमुळे विद्यार्थ्यांना शाळेत ये-जा करताना अडचणी निर्माण होण्याची शक्यता असून, सुरक्षिततेच्या दृष्टीने हा निर्णय घेण्यात आल्याचे प्रशासनाने स्पष्ट केले आहे. “विद्यार्थ्यांच्या सुरक्षिततेसाठी आणि आंतरराष्ट्रीय सायकल स्पर्धेचे सुरळीत आयोजन सुनिश्चित करण्यासाठी पुणे कॅन्टोन्मेंट बोर्ड हद्दीतील सर्व सरकारी व खासगी शाळा २१ जानेवारी २०२६ रोजी बंद राहतील,” असे आदेशात नमूद करण्यात आले आहे.

दरम्यान, सहपोलीस आयुक्त रंजन कुमार शर्मा यांनी नागरिकांना या परिसरात अनावश्यक वाहनांचा वापर टाळण्याचे आवाहन केले आहे. हा आदेश आपत्ती व्यवस्थापन अधिनियम, २००५ अंतर्गत देण्यात आला असून, मोठ्या सार्वजनिक कार्यक्रमांच्या वेळी प्रतिबंधात्मक उपाययोजना करण्याचे अधिकार जिल्हा प्रशासनाला आहेत.

हा निर्णय पुणे महानगरपालिका, पुणे पोलीस आयुक्तालय, शिक्षण अधिकारी तसेच संबंधित शाळा व्यवस्थापनांना कळविण्यात आला आहे. नागरिक, पालक, व्यापारी व व्यावसायिकांनी प्रशासनास सहकार्य करून आपले नियोजन करण्याचे आवाहन करण्यात आले आहे. आपत्कालीन सेवा सुरू राहणार असून, वाहतूक पोलीस प्रशासनाकडून अधिकृत सोशल मीडियाच्या माध्यमातून वाहतूकविषयक अद्ययावत माहिती दिली जाणार आहे.

‘बजाज पुणे ग्रँड टूर २०२६’ ही जागतिक स्तरावरील सायकल स्पर्धा असून, देश-विदेशातील नामांकित सायकलपटूंचा सहभाग लाभत आहे. या स्पर्धेमुळे पुणे शहराला आंतरराष्ट्रीय स्तरावर विशेष ओळख मिळण्याची अपेक्षा व्यक्त केली जात आहे.