पुणे: जप्तीचे वॉरंट घेउन गेलेल्या कर निरीक्षकाला धक्काबुक्की

पुणे, दि. १६/०३/२०२३-  महापालिकेकडील करआकारणी थकित प्रकरणी जप्तीचे वॉरंट घेउन गेलेल्या विभागीय कर निरीक्षकाला  धक्काबुक्की करीत एकाने शासकीय कामात अडथळा निर्माण केला. ही घटना १५ मार्चला पावणेबाराच्या सुमारास कोंढव्यातील मॅजिस्टीक व्हिला याठिकाणी घडली.

रफिक शेख (वय ४५ रा. कोंढवा खुर्द ) असे गुन्हा दाखल करण्यात आलेल्याचे नाव आहे. याप्रकरणी विभागीय कर निरीक्षक राजेंद्र वाघचौरे (वय ४९ ) यांनी कोंढवा पोलिस ठाण्यात तक्रार दिली आहे .

फिर्यादी राजेंद्र वाघचौरे हे महापालिकेतील कर आकारणी व कर संकलन विभागात निरीक्षक आहेत. कर थकविल्याप्रकरणी ते १५ मार्चला ते मॅजिस्टीक व्हिला याठिकाणी आरोपी रफिक शेख याला जप्तीचे वॉरंट देण्यासाठी गेले होते. त्यावेळी आरोपीने वाघचौरे यांच्याशी हुज्जत घालून धक्काबुक्की केली. त्यांना बघून घेण्याची धमकी देत  घरावर चिटकवलेले वॉरंट महिलेला फाडून टाकण्यास सांगितले. पोलीस उपनिरीक्षक एच.एच. शेख तपास करीत आहेत.