पुण्यातील सदाशिव पेठेत एका सदनिकेत आग; अग्निशमन दलाकडून आग नियंत्रित

सदाशिव पेठ, २२ जानेवारी २०२४: सदाशिव पेठ येथील कुमठेकर रस्त्यावर आज दुपारी एक आगीची घटना घडली.ही घटना दुपारी साधारण १:३९ वाजता अण्णाभाऊ साठे शाळेसमोरील एका सदनिकेत घडली. आग लागल्याची माहिती मिळताच कसबा अग्निशाम केंद्राकडून, जनता अग्निशमन केंद्राकडून व मुख्यालयातून एक वॉटर टँकर रवाना करण्यात आला.

घटनास्थळी पोहोचताच सदर ठिकाणी ४ मजल्याच्या इमारतीत दुसरया मजल्यावर एका सदनिकेत आग लागल्याचे पाहताच जवानांनी वर सदनिकेत प्रवेश करुन आगीवर पाण्याचा मारा सुरू केला व त्याचवेळी घरामध्ये कोणी आहे का याचीखात्री केली. सुमारे पंधरा मिनिटात जवानांनी आग आटोक्यात आणत पुढील धोका दुर केला.

घरामधील २ वापर करत असलेले व इतर ३ रिकामे असलेले घरगुती सिलेंडर जवानांनी तातडीने सुरक्षित ठिकाणी हलविले. सदर आगीमध्ये कोणी ही जखमी झाले नसून घरातील बॅटरी, इनवर्टर, वायरिंग, लाकडी कपाट, फर्निचर, गादी व इतर गृहपयोगी साहित्य पुर्ण जळाले आहे.

सदर कामगिरीत वाहनचालक अनिकेत ओवाळ, ओंकार साखरे, प्रसाद शिंदे, तांडेल संजय गायकवाड व फायरमन निलेश माने, शुभम देशमुख, आदित्य परदेशी, सागर इंगळे यांनी सहभाग घेतला.