मध्य रेल्वेचा दिवाळी/छठ पूजा उत्सव प्रवाशांसाठी बोनान्झा, विविध स्थळांसाठी एकूण ५७० विशेष ट्रेन सेवा चालविणार

मुंबई, १९/१०/२०२४: दिवाळी आणि छठ पूजा सणांच्या निमित्ताने गर्दी लक्षात घेऊन आरामदायी प्रवास साध्य करण्यासाठी मध्य रेल्वेने आपल्या प्रवाशांसाठी एकूण ५७० विशेष ट्रेन सेवांची घोषणा केली आहे.

८५ विशेष ट्रेन्सची घोषणा करण्यात आली आहे जी या ५७० विशेष ट्रेन सेवा पूर्ण करतील, त्यापैकी ४२ सेवा आधीच पूर्ण केल्या गेल्या आहेत. या गाड्यांमध्ये वातानुकूलित विशेष, वातानुकूलित, शयनयान आणि जनरल डब्यांच्या मिश्र संयोजन असलेल्या गाड्या आणि अनारक्षित विशेष गाड्यांचा समावेश आहे. दिवाळी / छठ पूजा उत्सव विशेष गाड्या मुंबई, पुणे, नागपूर इ. येथून देशभरातील विविध ठिकाणी चालवल्या जात आहेत.

५७० फेस्टिव्हल स्पेशल ट्रेन सेवांपैकी १०८ सेवा महाराष्ट्रातील लातूर, सावंतवाडी रोड, नागपूर, पुणे, कोल्हापूर, नांदेड आणि इतर ठिकाणी प्रवास करणाऱ्या प्रवाशांसाठी मध्य रेल्वे द्वारे चालवल्या जात आहेत.

उत्तरेकडे जाणाऱ्या प्रवाशांसाठी मध्य रेल्वे दानापूर, गोरखपूर, छपरा, बनारस, समस्तीपूर, आसनसोल, आगरतळा, संत्रागाछी आणि इतर ठिकाणी ३७८ सेवा चालवत आहे. ३७८ सेवांपैकी १३२ सेवा मुंबईतून, १४६ सेवा पुण्यातून आणि उर्वरित इतर ठिकाणांहून मध्य रेल्वेवर चालवल्या जात आहेत.

दक्षिणेकडे जाणाऱ्या प्रवाशांसाठी मध्य रेल्वे करीमनगर, कोचुवेली, काझीपेट, बेंगळुरू आणि इतर गंतव्यस्थानांसारख्या विविध ठिकाणी ८४ सेवा चालवत आहे.
या फेस्टिव्हल स्पेशल ट्रेन्स प्रवाशांना त्यांच्या प्रवासाचे नियोजन करण्यासाठी उपयुक्त ठरतील जेणेकरून त्यांच्या गंतव्यस्थानी पोहोचता येईल. तसेच त्यांच्या जवळच्या आणि प्रियजनांसोबत दिवाळी/छठ सण साजरे करता येतील.

या गाड्यांची बुकिंग सुरू झाली असून प्रवाशांना लवकरात लवकर तिकिटे बुक करता येतील. तपशीलवार वेळा आणि थांब्यासाठी कृपया www.enquiry.indianrail.gov.in ला भेट द्या किंवा NTES ॲप डाउनलोड करा.

मध्य रेल्वे, प्रवाशांना गैरसोय टाळण्यासाठी वैध तिकीट आणि ओळखपत्र घेऊन प्रवास करण्याचे आवाहन करीत आहे. प्रवाशांनी रेल्वेच्या सेवा निवडण्यात त्यांचा विश्वास आणि पाठिंबा दिल्याबद्दल मध्य रेल्वे व्यवस्थापन त्यांचे आभार व्यक्त करते. आमच्या सर्व आदरणीय प्रवाशांना सुरक्षित, आरामदायी आणि सोयीस्कर प्रवास अनुभव देण्यासाठी आम्ही वचनबद्ध आहोत.