पुणे महापालिकेतील नगरसेवकांना हवा बिल्ला: अमर आवळेंची मागणी

पुणे, १३ मार्च २०२६: पुणे महानगरपालिकेतील सर्व नगरसेवकांना महापालिकेच्या बोधचिन्हासह अधिकृत बॅच (बिल्ला) देण्यात यावा, अशी मागणी नगरसेवक अमर आवळे यांनी महापालिकेच्या नगरसचिवांकडे केली आहे. यासंदर्भात त्यांनी नगरसचिव योगिता भोसले यांना पत्र दिले आहे.

आवळे यांनी दिलेल्या पत्रात नमूद केले आहे की, महाराष्ट्र राज्य विधानसभेतील आणि विधान परिषदेतील सदस्यांना ओळख म्हणून हिरव्या व लाल रंगाचे बॅच देण्यात आलेले आहेत. त्याच धर्तीवर पुणे महानगरपालिकेत निवडून आलेल्या सर्व नगरसेवकांना ‘पुणे महानगरपालिका’च्या बोधचिन्हासह ‘सभासद’ असा अधिकृत बॅच देण्यात यावा.

नगरसेवकांना अधिकृत बॅच मिळाल्यास नव्याने निवडून आलेले लोकप्रतिनिधी आणि महापालिकेचे प्रशासकीय अधिकारी यांच्यात सुसंवाद आणि समन्वय साधण्यास मदत होईल, असेही त्यांनी पत्रात म्हटले आहे. तसेच महाराष्ट्रातील इतर महानगरपालिका आणि नगरपालिकांमध्येही अशा प्रकारचा अभिनव उपक्रम राबविण्याचा विचार करता येईल, असेही त्यांनी सुचविले आहे.

या संदर्भात आवश्यक प्रशासकीय मान्यता घेऊन पुढील कार्यवाही करावी, अशी विनंती आवळे यांनी महापालिकेकडे केली आहे.