Pune: हिंजवडीतील यशवीन सोसायटीचा वीजपुरवठा पूर्ववत, क्राँकीटच्या खाली खोलवर होता बिघाड

पुणे, दि. ७ एप्रिल, २०२६- मेट्रोच्या कामादरम्यान उच्चदाबाची वाहिनी नादुरुस्त झाल्याने हिंजवडी भागातील ‘यशवीन’ या हाऊसिंग सोसायटीचा सोमवारी (दि.६) दुपारी १२.४८ वाजता बंद झाला होता. तब्बल २२ तासांच्या अविश्रांत मेहनतीनंतर मंगळवारी (दि.७) सकाळी १०.५० वाजता वीजपुरवठा पूर्ववत करण्यात वीज कर्मचाऱ्यांना यश मिळाले आहे.

 हिंजवडी औद्योगिक वसाहत फेज-३ कडे जाताना डॉहलर कंपनीजवळ मेट्रोस्टेशनचे काम सुरु आहे. कामे करताना मेट्रोकडून महावितरणच्या केबलवर काँक्रीटचे थरावर थर पडल्याने वीज वाहिन्या काँक्रीटमध्ये खोलवर गेल्या आहेत. सोमवारी दुपारी १२.४८ वाजता यशवीन सोसायटीला वीजपुरवठा करणारी २२ केव्ही उच्चदाब वाहिनी नादुरुस्त झाली. या वाहिनीद्वारे यशवीन सोसायटीमधील ३ रोहित्रांना वीजपुरवठा केला जातो. वाहिनी/केबल नादुरुस्त झाल्याने या रोहित्रांवरील ५७२ ग्राहकांचा वीजपुरवठा खंडित झाला.

 वीज कर्मचाऱ्यांनी युद्धपातळीवर दुरुस्ती मोहीम हाती घेतली. सोमवारी सायंकाळी ७ वाजेपर्यंत काम करुन एक फॉल्ट दुरुस्त देखील केला. परंतू, चाचणी दरम्यान दुसरा फॉल्ट आढळून आला. तो काँक्रीट खाली होता. तो काढण्यासाठी रात्रभर खोदकाम केले. मात्र केबल दिसून आली नाही. मंगळवारी सकाळी ७ वाजता केबल सापडली. पण त्यासाठी आणखी काँक्रीट फोडावे लागत आहे. मूळ बिघाड काढण्याचे काम मंगळवारी दुपारीही सुरुच होते. तत्पूर्वी ३० मीटर उच्चदाब केबल टाकून महावितरणने पर्यायी मार्गाने यशवीन सोसायटीचा वीजपुरवठा सुरळीत करण्यात आलेला आहे.