April 24, 2024

अखिल महाराष्ट्र आंतरक्लब टेनिस स्पर्धेत पीवायसी अ संघाला विजेतेपद

पुणे, 3 एप्रिल 2023: सहाव्या अखिल महाराष्ट्र आंतरक्लब टेनिस स्पर्धेत अंतिम फेरीत पीवायसी अ संघाने खार लिजेंड्स संघाचा 26-13 असा पराभव करून विजेतेपद संपादन केले.  याआधी साखळी फेरीत  खार लिजेंड्ससंघाकडून पराभव पत्करावव्या लागणाऱ्या पीवायसी अ संघाने अंतिम फेरीत विजय मिळवत सलग सहाव्या वर्षी या स्पर्धेत विजेतेपदाचा मान पटकावला.

रवाईन हॉटेल, पाचगणी येथील टेनिस कोर्टवर पार पडलेल्या या स्पर्धेत अंतिम फेरीत सामन्यात 110 अधिक गटात पीवायसीच्या हिमांशू गोसावी व जयंत कढे यांनी खार लिजेंड्सच्या भूषण अकुत व गौरव कपाडिया यांचा टायब्रेकमध्ये 8-7(7-2) असा पराभव केला. 100 अधिक गटात पीवायसीच्या केदार शहा व प्रशांत गोसावी या जोडीने लविन खेमानी व गौतम चांदे यांचा 8-1 असा पराभव करून संघाला आघाडी मिळवुन दिली. 90 अधिक गटात अनुप मिंडाने योगेश पंतसचिवच्या साथीत वर्धन शहा व अमित तांबे या जोडीचा  8-3 असा पराभव करून संघाला विजयी आघाडी मिळवून दिली. सामन्यात विजयी आघाडीवर असलेल्या पीवायसी संघाने अखेरच्या खुल्या गटात  2-2 अशी स्थिती असताना पीवायसीच्या अभिषेक ताम्हाणे व केतन धुमाळ आणि  इम्रान युसूफ व अमन कोहली यांच्यातील सामना थांबविण्यात आला. 


3 ऱ्या व 4थ्या स्थानासाठी झालेल्या लढतीत महेंद्र लिखिते, आकाश काळे, करण सिंग, विमल रॉय, राजेश नायर, रोहन माणिक, आनंद मूर्ती, आदित्य संघवी यांच्या विजयी कामगिरीच्या जोरावर मुंबई क्रिकेट असोसिएशन (एमसीए) संघाने पीवायसी ब संघाचा 24-14 असा पराभव करून तिसरा क्रमांक पटकावला.

स्पर्धेतील विजेत्या पीवायसी अ संघाला करंडक व 1 लाख 25 हजार रुपये, तर उपविजेत्या खार लिजेंड्स संघाला करंडक व 75000रुपये अशी पारितोषिके देण्यात आली. तिसऱ्या क्रमांकाच्या विजेत्या संघाला 25000 रुपये अशी पारितोषिके देण्यात आली. पीवायसी ब संघाच्या डॉ अभय जमेनीसला सर्वोत्कृष्ट वरिष्ठ खेळाडू हा पुरस्कार देण्यात आला.  

 
स्पर्धेचे पारितोषिक वितरण एमएसएलटीएचे आजीव अध्यक्ष शरद कन्नमवार, एमएसएलटीएचे अध्यक्ष भरत ओझा यांच्या हस्ते करण्यात आले. यावेळी एमएसएलटीएचे चेअरमन प्रशांत सुतार, मानद सचिव सुंदर अय्यर, खजिनदार सुधीर भिवापूरकर, उपाध्यक्ष राजीव देशपांडे व विश्वास लोकरे, सहसचिव राजीव देसाई, चंद्रकांत दळवी आणि हॉटेल रवाईनचे जावेद सुनेसरा आदी मान्यवर उपस्थित होते.  एमएसएलटीएचे मुख्य कार्यकारी अधिकारी मनोज वैद्य यांनी कार्यक्रमाचे सूत्रसंचालन केले. 

स्पर्धेचा सविस्तर निकाल: अंतिम फेरी:
पीवायसी अ वि.वि.खार लीजेंड्स 26-13(110 अधिक गट: जयंत कढे/हिमांशु गोसावी  वि.वि.भूषण अकुत/गौरव कपाडिया 8-7(7-2); 100 अधिक गट: केदार शहा/प्रशांत गोसावी  वि.वि.लविन खेमानी/गौतम चांदे 8-1; 90 अधिक गट: अनुप मिंडा/योगेश पंतसचिव  वि.वि.वर्धन शहा/अमित तांबे 8-3; खुला गट: केतन धुमाळ/अभिषेक ताम्हाणे  वि.वि.इम्रान युसूफ/अमन कोहली 2-2);

3 ऱ्या व 4थ्या स्थानासाठी लढत: मुंबई क्रिकेट असोसिएशन (एमसीए) वि.वि.पीवायसी ब 24-14(110 अधिक गट: महेंद्र लिखिते/आकाश काळे  वि.वि.अभय जमेनिस/सारंग देवी 6-4; 100 अधिक गट: करण सिंग/विमल रॉय  वि.वि.सुंदर अय्यर/अमित नाटेकर 6-3; 90 अधिक गट: राजेश नायर/रोहन माणिक वि.वि.ध्रुव मैड/श्रवण हर्डीकर 6-3; खुला गट: आनंद मूर्ती/आदित्य संघवी वि.वि.अमोघ बेहेरे/रोहित शिंदे 6-4).