पुणे ग्रामीण पोलीस गणेशोत्सव २०२४ व ईद-ए-मिलाद साठी सज्ज

टीकम शेखावत

पुणे, २८/०८/२०२४: आगामी गणेशोत्सव २०२४ आणि ईद-ए-मिलाद सणांच्या तयारीच्या अनुषंगाने, पुणे ग्रामीण जिल्हा पोलीस मुख्यालयात कोल्हापूर परिक्षेत्राचे विशेष पोलीस महानिरीक्षक यांच्या अध्यक्षतेखाली कायदा व सुव्यवस्थेची आढावा बैठक पार पडली. या बैठकीत सणांच्या काळात कायदा व सुव्यवस्था राखण्यावर भर देण्यात आला.

विशेष पोलीस महानिरीक्षकांनी पुणे ग्रामीण पोलिसांनी शांततापूर्ण सण साजरे होण्यासाठी केलेल्या नियोजनाची तपासणी केली. पूर्वी गुन्हे दाखल असलेल्या गुन्हेगारांवर प्रतिबंधक कारवाई करून ते सणांमध्ये अडथळा आणू नयेत यासाठी योग्य उपाययोजना करण्यावर त्यांनी जोर दिला. गणेश मंडळांच्या बैठका घेणे आणि ईद-ए-मिलादच्या संदर्भात शांतता समितीच्या बैठका आयोजित करून आवश्यक त्या सूचना देण्याचे निर्देशही दिले.

तसेच, दंगा नियंत्रण योजना लागू करणे आणि संवेदनशील ठिकाणी रूट मार्च आयोजित करणे यासारख्या उपाययोजना करून जातीय तणाव निर्माण होणार नाही याची खबरदारी घेण्याच्या सूचनाही देण्यात आल्या. महिलांविषयक गुन्ह्यांना प्रतिबंध करण्यासाठी शाळा आणि महाविद्यालयांमध्ये जनजागृती कार्यक्रम आयोजित करावेत, आणि अनुचित घटनांवर तत्काळ कायदेशीर कारवाई करावी, अशा सूचना देखील देण्यात आल्या.

आगामी विधानसभा निवडणुकीच्या पार्श्वभूमीवर मतदान केंद्रांच्या सुरक्षिततेचा आढावाही घेण्यात आला. सोशल मीडियावर अनुचित संदेश पोस्ट करणाऱ्यांवर कायदेशीर कारवाई करावी आणि उपद्रवी लोकांच्या हालचालींवर लक्ष ठेवावे, असेही निर्देश देण्यात आले.

या बैठकीत पुणे ग्रामीण जिल्ह्यातील गुन्ह्यांचा आढावाही घेण्यात आला. विशेष पोलीस महानिरीक्षकांनी पुणे ग्रामीण पोलिसांनी दरोड्याच्या गुन्ह्यांना आळा घालण्यासाठी केलेल्या प्रयत्नांचे कौतुक केले आणि इतर गुन्ह्यांवर नियंत्रण ठेवून जास्तीत जास्त गुन्ह्यांचा उलगडा करण्याच्या सूचना दिल्या.

पुणे ग्रामीणचे पोलीस अधीक्षक पंकज देशमुख यांनी सांगितले की, गणेशोत्सव आणि ईद-ए-मिलाद दरम्यान कायदा व सुव्यवस्था अबाधित ठेवण्यासाठी त्यांची टीम पूर्णतः सज्ज आहे. जिल्हा विशेष शाखा, स्थानिक गुन्हे शाखा, बिनतारी संदेश विभाग, कल्याण शाखा यासारख्या विविध शाखांचे नियोजन विशेष पोलीस महानिरीक्षकांना सादर करण्यात आले. या बैठकीला वरिष्ठ अधिकारी, पोलीस अधीक्षक, पुणे ग्रामीण, आणि विविध विभागांचे प्रमुख अधिकारी उपस्थित होते.